22.06.2009

Türkmen Döwlet habarlar gullugy

Sabantuý dostlaryny çagyrýar

Prezident Gurbanguly Berdimuhamedowyň tabşyrygy boýunça Türkmenistanyň delegasiýasy tatar halkynyň baýramçylygy—Sabantuý mynasybetli şu gün bu ýerde ýaýbaňlandyrylan dabaralara gatnaşdy. Türkmenistanyň wekilleriniň arasynda türkmen atlylary hem bar, olar özleriniň şowhunly maksatnamasy—meşhur at üstündäki milli oýunlary bilen geldiler.

Şadyýan, pähimli Sabantuý—tatar halkynyň iň gadymy we söýgüli baýramlarynyň biridir, häzirki wagtda ol döwlet derejesinde bellenilýär. Azal baýramçylygy hökmünde döräp, ol turuwbaşdan topragyň oýanmagyny, ekerançynyň zähmetini, öňden gelýän duz-çörekliligi we myhmansöýerligi aňladýar.

Türkmen delegasiýasynyň Sabantuýa gatnaşmagynyň özi üstünlikli ösdürilýän türkmen-tatar gatnaşyklarynyň şaýatnamasydyr. Häzirki günde Tatarystan ozaly bilen awtoulag we dikuçarlar tehnikasyny ibermekde, ýurdumyzyň awtoulag sportuny ösdürmekde Türkmenistanyň iň iri hyzmatdaşlarynyň birine öwrüldi. «Kamaz» kysymly awtoulaglar ýurdumyzyň ähli gurluşyklarynda işledilýär, Naberežnyýe Çelny şäherinden bolan awtoulag sürüjiler topary bolsa «Ýüpek ýoly—2009» ralli-reýdiniň bilelikdäki guramaçysydyr. Bary-ýogy birnäçe gün mundan ozal «KER-Holding» kompaniýasyna «Awazada» üsti ýapyk lyža toplumyny gurmak üçin ýer uçastogyny bölüp bermek baradaky sertifikat gowşuryldy. Aýratynam bilim we ylym babatlarynda gumanitar gatnaşyklar işjeň ösdürilýär.

Galyberse-de, bizi medeni gymmatlyklarymyzyň, dini däplerimiziň umumylygy birleşdirýär, biziň halklarymyz olaryň gadyryny bilýär. Aýawlylyk bilen goralyp saklanylýan milli baýramçylyklarymyz onuň subutnamasy bolup biler. Şolarda owadan halk däpleri, aýdymlar, tanslar, özboluşly dessurlar bilelikde utgaşyp gidýär. Türkmen we tatar halklary öz baýramçylyklaryny aýratyn giň gerim we şadyýanlyk bilen belleýärler.

Sabantuý munuň aýdyň mysalydyr, ol nesilleriň arabaglanyşygynyň, özara düşünişmegiň we jebisligiň alamatydyr. Onuň giň meýdanynda täze zehinler ýüze çykarylýar, adamlaryň arasynda ýönekeý, ýürekdeş gürrüňdeşlik başlanýar, ene diline, milli medeniýete, ata-babalaryň däplerine hormat goýmak duýgulary terbiýelenilýär. Sabantuýyň beýik ýaşaýyş güýji we onuň hakykatdan-da dünýä boýunça meşhurlygy hem şonda jemlenendir.

Baýramçylyk Sabantuýyň simwolyny—iki ujy gyzyl reňkli ak polotensäniň dabaraly ýagdaýda ýokary galdyrylmagy bilen başlandy. Ähli ýerlerde, Kazanda, respublikanyň beýleki şäherlerinde we obalarynda milli aýdymlar we mukamlar ýaňlandy, joşgunly tanslar ýerine ýetirildi. Dabaralar «Kazan» halkara atly sport toplumynda tamamlandy. Şol ýerde aklyňy haýran edýän at çapyşyklary we ahalteke bedewlerinde türkmen ýigitleriniň görkeziş çykyşlary boldy. Şowhunly maksatnama at üstündäki dürli milli oýunlary hem öz içine aldy, olar türkmen çapyksuwarlarynyň ajaýyp ussatlygyny, özleriniň «behişti bedewleriniň» deňi-taýy bolmadyk owadanlygyny görkezmäge mümkinçilik berdi, köp sanly tomaşaçylar olara tomaşa etmekden lezzet aldylar.